Kulan lagu taageerayey
Suldaan lagu caleemo saaray degaanka Bacaad-weyn oo
Muqdisho lagu qabtay (SAWIRRO)
Waxaa maanta magaalada Muqdisho gaar ahan hotelka Wardheer
lagu qabtay kulan balaaran oo lagu taageerayey suldaanka
cusub ee beesha Qubeys Suldaan C/llaahi Suldaan C/raxmaan
Suldaan Muxumad oo dhowaan lagu caleemo saaray degaanka
Bacaad-weyn ee gobolka Mudug.
Kulankan oo ahaa mid qaddo ah ayaa waxaa ka qeyb galay
Waxgarad, Odayaal dhaqameedyo, aqoonyahano, Qurba-joog,
dhalinyaro iyo haween ayaa waxaa si weyn loogu ayiday
Suldaanka cusub ee la caleemo saaray.
Waxaa kulankaas ugu horeyn ka hadlay Ex: xilibaanad
Caaqil Xuseen Geeddi Jimcaale oo halkaas ka jeediyey
hadalo soo dhoweyn iyo taageero ah wuxuuna xusay in
xubnaha beesha Qubeys ee jooga Xamar ay si weyn u taageerayaan
suldaanka cusub.
Suldaan C/nuur Axmed Shiikh Muuse oo isna ka hadlay
kulankan ayaa faahfaahin ka bixiyey taariikhda Saldanada
beesha Qubeys oo uu sheegay iney soo taxneyd muddo fog.
“Suldaanka cusub Suldaan C/llaahi, awoowayaashiis ayaa
suldaano ahaa sida ka muuqata abtiriskiisa waa nin culumo
ah, ILAAHAY ka baqa, weligiisna aan bulshada dembi ka
gelin waxaaana alle uga baryeynaa inuu xilkaas ALLE
la garab galo” ayuu yiri Suldaan C/nuur oo dad yar oo
suldaanka diidan ugu baaqay iney taageeraan, iskana
dhaafaan khilaafka.
Sidoo kale, waxaa kulankan ka hadlay Ugaas C/raxmaan
Xaaji Xuseen oo suldaanka cusub ugu baaqay inuu cadaalad
ku maamulo shacabka uu hogaanka u hayo, kuna dedaalo
sidii bulshada horumarkeeda looga shaqeyn lahaa.
Waxaa sidoo kale hadalo isugu jiray Guubaabo, taageero
iyo Duco ka jeediyey xubno fara badan oo ay ka mid yihiin
Shariif Shiikh Cumar Maxamed oo ku hadlayey magaca qurba
joogta Qubeys, Caaqil Shiikh Axmed Shiikh C/llaahi Shiikh
Cumar, Nabadoon Aadan Cali Xasan, Axmed Muxumad Aadan,
Ubax Maxamed Aadan oo ku hadleysay magaca haweenka beesha
iyo xubno kale.
Intii munaasabadaas ay socotay ayaa haween ka tirsan
kuwa ka soo qeyb galay kulankan waxay ka tiriyeen buraanburo
iyo Suugaan kale oo ay ku taageerayaan suldaanka cusub
ee beesha Qubeys Suldaan C/llaahi Suldaan C/raxmaan
Suldaan Muxumad, waxayna xafladaas ku soo dhamaatay
jawi aad u wanaagsan.
